अपहरण करून खून; गुन्ह्यात फिर्याद दिल्याच्या रागातून खून करून मृतदेह फेकला रस्त्यावर..
बंदुकीचा धाक दाखवल्या प्रकरणी पोलिस ठाण्यात फिर्याद देत अटक करण्यास भाग पाडल्याप्रकरणी राग मनात धरून माळकरंजा (ता. कळंब ) येथील एकाचे नातेवाईकांसमोरून अपहरण केले. नंतर दगड-धोंड्याने डोक्यात वार करून मृतदेह मंगरूळ शिवारात रस्त्यावर फेकला. ही घटना गुरूवारी सायंकाळी सहा वाजेच्या सुमारास घडली. याप्रकरणी ९ जणांवर गुन्हा दाखल करण्यात आला आहे.
दरम्यान, मृताच्या नातेवाइकांनी कारवाईच्या मागणीसाठी तब्बल १३ तास मृतदेह ताब्यात घेतला नाही. यामुळे दिवसभर कळंब येथील उपजिल्हा रुग्णालयासमोर तणाव होता. माळकरंजा येथे गुरूवारी सायंकाळी सहा वाजेच्या सुमारास महादेव हीरा काळे, सरदार उमराव चव्हाण, अनिता बादल चव्हाण, सोनाबाई सरदार चव्हाण ओट्यावर गप्पा मारत बसले होते. तेव्हा एक जीप व अन्य दोन चारचाकीवाहने तेथे आली. काळे यांच्या घराजवळ उतरून ओट्यावर बसलेल्या महादेव हीरा काळे याला "उचला रे याला गाडीत टाका, काय होईल ते होईल, याचा मर्डरच कारायचा'' असे म्हणून चार ते पाच जणांनी पकडले. महादेवने प्रतिकार केला असता डोके, छाती, पायावर मारहाण केली. नंतर जीपमध्ये बसवून त्याचे अपहरण केले. सर्वजण तिन्ही वाहनांमधून निघून गेले. नंतर मारहाण करून महादेव काळे याचा मृतदेह मंगरुळ पाटीजवळ बस थांब्याच्या समोरील बाजुला टाकला. या प्रकरणी विकास बब्रु काळे, सूरज राजेंद्र पवार, गंगाराम बापू पवार, बबलु राजेंद्र पवार, बप्पा ऊर्फ खाज्या रामराजे पवार रवी काळे याचा मुलगा व अन्य तिघे असे नऊ जणांच्या विरोधात याप्रकरणी शिराढोण पोलिस गुन्हा दाखल करण्यात आला आहे.
No comments:
Post a Comment