अहमदनगर शहरासह जिल्ह्यात वादळी वाऱ्यासह पावसाची हजेरी; वीज पडून एकाचा मृत्यू..
अहमदनगर - नगर शहरासह जिल्ह्याच्या विविध भागात रविवारी दुपारी वादळी वाऱ्यासह पावसाने हजेरी लावली. अकोले तालुक्यातील म्हाळादेवी गावातील वाडा शिवारात रामदास लक्ष्मण उघडे (वय ५६) या शेतकऱ्याचा वीज पडून मृत्यू झाला. दरम्यान, वादळी वाऱ्यामुळे नगर शहर व जिल्ह्याच्या विविध भागात १६ ठिकाणी झाडे उन्मळून पडली. तर शेकडो झाडांच्या फांद्या तुटून पडल्या. नगर शहरात रविवारी दुपारी वादळी वाऱ्यासह झालेल्या पावसामुळे सहकार नगर तीन मंदीर येथील ३० वर्षे जुने वडाचे झाड उन्मळून पडले. तसेच इस्कॉन मंदीर येथेही झाड पडले.
केडगाव व सावेडी उपनगरात ठिकठिकाणी झाडांच्या फांद्या तुटून पडल्या. महापालिकेच्या उद्यान विभागाचे प्रमुख शशिकांत नजान, मुकादम विजय कुलाळ, माळी, गणेश दाणे व कर्मचाऱ्यांनी घटनास्थळी जावून पडलेली झाडे व फांद्या हटवल्या. महावितरणच्या वीजवाहक तारांचेही नुकसान झाले. नगर शहरात दुपारपासून अनेक ठिकाणी वीजपुरवठा खंडित झाला होता.
No comments:
Post a Comment