पशुसंवर्धन’चा लाचखोर सहायक आयुक्त एसीबीच्या जाळ्यात..
.jpg)
अकोला - लम्पी आजाराने दगावलेल्या जनावरांची नुकसान भरपाई मंजूर करण्यासाठी अकोला पशुसंवर्धन विभागाचा सहायक आयुक्त डॉ. प्रवीण नारायण राठोड व खासगी इसम राजीव शंकरराव खाडे याला आठ हजार रुपयांची लाच घेताना रंगेहाथ पकडले. ही कारवाई अकोला लाचलुचपत प्रतिबंधक विभागाने(एसीबी) शुक्रवारी रात्री केली. मलकापूर मधील मयुर कॉलनी येथील तक्रारकर्ते यांची कालवड आणि एका गोऱ्याला जीवघेणा लम्पी आजार झाला होता. त्यात दोन्ही जनावरे दगावली होती.
दगावलेल्या जनावरांची नुकसान भरपाई म्हणून प्रती जनावर १६ हजार रूपये देण्याचा शासन निर्णय होता. त्यानुसार तक्रारदार यांनी पशुसंवर्धन विभागाकडे नुकसान भरपाई मिळावी म्हणून अर्ज केला होता. त्यांना ३२ हजार रुपये नुकसान भरपाई मिळाली होती . रक्कम मंजूर करून दिली त्याबदल्यात प्रवीण राठोड याने दहा हजार रुपयांची मागणी केली होती. तडजोडीअंती ही रक्कम आठ हजार रुपयांवर आली होती. मात्र, तक्रारदाराला लाच द्यायची नसल्याने त्याने अकोला एसीबीकडे गुरुवारी तक्रार केली होती. एसीबीचे पोलिस उपअधीक्षक शैलेश सपकाळ यांनी पंचासमक्ष पडताळणी करून शुक्रवारी सापळा रचला.
या सापळ्यात पशुसंवर्धन सहायक आयुक्त डॉ. प्रवीण राठोड याच्या वतीने राजीव शंकरराव खाडे हा आठ हजार रुपयांची लाच घेताना अडकला. रात्री उशिरा या प्रकरणी दोंघाविरुध गुन्हा दाखल करण्याची प्रक्रिया सुरू होती. ही कारवाई एसीबीचे पोलिस उपअधीक्षक शैलेश सपकाळ यांच्या मार्गदर्शनात करण्यात आली. शासकीय, निमशासकीय अधिकारी लाचेची मागणी करीत असतील तर त्यांची तक्रार करावी, तक्रारकर्तांचे नाव गोपनीय ठेवण्यात येईल, असे आवाहन एसीबीचे पोलिस उपअधीक्षक शैलेश सपकाळ यांनी केले आहे.
No comments:
Post a Comment