आपसातील वादामुळे; सोळा वर्षीय मुलाचा निर्घृण खून.
अकोला - १६ वर्षीय मुलाचा धारदार शस्त्राने गळा कापून त्याची निर्घृण हत्या करण्यात आली. त्यानंतर हल्लेखोर पळून गेला. हल्लेखोर हा अल्पवयीन असल्याचा संशय पोलिसांना आहे. ही घटना गुरुवारी रात्री अकरा वाजताच्या सुमारास सिटी कोतवाली पोलिस ठाण्याच्या हद्दीतील कमला नेहरू नगर परिसरात घडली. रोहन रणजीत सोळंके असे मृत युवकाचे नाव आहे. गुरुवारी याच परिसरात लग्न असल्याने त्याचे मित्र लग्नात होते.
रात्री रोहन परिसरातील नदीच्या काठावर असलेल्या गाडीवर मोबाइल पाहत बसला होता. पूर्ववैमनस्यातून पाठीमागून हल्लेखोर आले आणि त्याच्या मानेवर शस्त्राने वार केला. त्यानंतर समोरून त्याच्या पोटावर वार केल्याने तो रक्ताच्या थारोळ्यात निपचित पडला. त्यानंतर हल्लेखोर नदीच्या पुलालगत पळून गेले. शहरात दंगलीची घटना ताजीच असल्याने संपूर्ण शहरात आधीच अर्लटमोडवर असलेल्या पोलिसांना घटनेची माहिती मिळताच सिटी कोतवाली पोलिस ठाण्याचे ठाणेदार चंद्रशेखर कडू ताफ्यासह पोहोचले होते. तसेच स्थानिक गुन्हे शाखेचे पोलिस निरीक्षक संतोष महल्ले, फिंगरप्रिंट एक्सपर्ट, डॉगस्कॉडनेही आरोपीचा शोध घेण्याचा प्रयत्न केला. मात्र आरोपी सापडला नाही. हल्लेखोर हा अल्पवयीन असल्याने त्याच परिसरातील रहिवासी असल्याचा संशय पोलिसांना आहे. रात्री उशिरा पोलिसांनी परिसरातील काही युवकांना ताब्यात घेतले होते. त्यांची विचारपूस करून त्यांच्याकडून पोलिसांनी माहिती घेतली व त्यांना सोडून दिले होते. सिटी कोतवाली पोलिस व स्थानिक गुन्हे शाखेचे पोलिस आरोपीचा शोध घेत आहेत. घटनास्थळावर पोलिस अधीक्षक संदीप घुगे यांनी भेट देऊन पोलिसांना तपासाच्या सूचना दिल्या.
No comments:
Post a Comment