रस्ता चुकल्याने ट्रक चालक आणि क्लीनर मध्ये वाद.. रागाच्या भरात क्लीनर ने केले असे काही..
पुणे : रस्ता चुकल्याच्या वादातून ट्रकचालकाचा खून केल्याची घटना नगर रस्ता परिसरात घडली. रस्ता चुकल्याने ट्रकचालक आणि क्लीनर यांच्यात वाद झाला. त्यानंतर क्लीनरने चालकाच्या डोक्यात गज मारून त्याचा खून केला. या प्रकरणी क्लीनरला अटक करण्यात आली आहे.
शहजाद अब्दुलकय्युम अहमद (26, रा. उत्तर प्रदेश) असे खून झालेल्याचे नाव आहे. या प्रकरणी क्लीनर शमशुल अलीअहमद खान (26, जिल्हा संत कबीरनगर, उत्तर प्रदेश) याला अटक करण्यात आली आहे. याप्रकरणी संजय कालीरामना (41, रा. वलसाड, गुजरात) यांनी लोणी कंद पोलिस ठाण्यात तक्रार केली. कालीरामना यांचा मालवाहतुकीचा व्यवसाय आहे. त्यांच्या ट्रकवर आरोपी शमशुल क्लीनर म्हणून काम करीत होता. शहजाद आणि शमशुल पुणे-नगर रस्ता परिसरातील तुळापूर ते लोणी कंद या रस्त्यावरून जात होते. त्या वेळी ट्रकचालक शहजाद वाट चुकला. या कारणावरून शहजाद आणि शमशुल यांच्यात वाद झाला. शमशुलने ट्रकमधील लोखंडी गज शहजादच्या डोक्यात मारला. गंभीर जखमी अवस्थेतील शहजादचा ट्रकच्या केबिनमध्येच मृत्यू झाला.
ट्रक वेळेत न पोहचल्याने ट्रकमालक कालीरामना यांनी दोघांच्या मोबाइलवर संपर्क साधला. दोघांचे मोबाइल क्रमांक बंद असल्याने संपर्क झाला नाही. त्यांनी केलेल्या चौकशीत ट्रक तुळापूर ते लोणी कंद रस्त्यावर थांबला असून, ट्रकचालक शहजादचा खून झाल्याचे उघडकीस आले. त्यानंतर लोणी कंद पोलिस ठाण्याचे वरिष्ठ पोलिस निरीक्षक गजानन पवार यांच्या मार्गदर्शनाखाली तपास पथकाने तपास सुरू केला. क्लीनर जागेवर नसल्याने त्याच्याविरुद्ध संशय बळावला. त्याची माहिती घेतली असता तो नाशिकमध्ये असल्याची माहिती मिळाली. पोलिसांच्या पथकाने त्याला नाशिकमधून अटक केली.
No comments:
Post a Comment