टाळेबंदीतही पारनेर तालुक्यात अवैध वाळू वाहतूक जोमात - Nagari Davandi : Breaking & Latest Marathi News Live, Marathi News Updates

Breaking

Post Top Ad

Responsive Ads Here

Monday, April 26, 2021

टाळेबंदीतही पारनेर तालुक्यात अवैध वाळू वाहतूक जोमात

 टाळेबंदीतही पारनेर तालुक्यात अवैध वाळू वाहतूक जोमात

उपप्रादेशिक परिवहन कार्यालयातील वाहन निरीक्षकांची फक्त पाच वाहनांवर कारवाई केल्याचा आरोप

शंभरपेक्षा जास्त अवैध वाळू वाहतूक करणारी वाहने सीसीटिव्ही मध्ये कैद

कारवाई न करणार्‍या वाहन निरीक्षकाची चौकशी करण्याची अन्याय निवारण निर्मूलन सेवा समितीची मागणी 



नगरी दवंडी

 अहमदनगर(प्रतिनिधी)- टाळेबंदीत देखील पारनेर तालुक्यात अवैध वाळू वाहतूक मोठ्या प्रमाणात सुरु असून, वाळू वाहतूक करणार्‍या विना क्रमांकाच्या वाहनांवर उपप्रादेशिक परिवहन कार्यालयातील वाहन निरीक्षक आर्थिक हितसंबंध असल्याने जाणीवपुर्वक कारवाई करीत नसल्याचा आरोप अन्याय निवारण निर्मूलन सेवा समितीच्या वतीने करण्यात आला आहे. तर या प्रकरणी उपलब्ध असलेल्या सीसीटिव्ही फुटेजची पहाणी करुन संबंधीत वाहन निरीक्षकाची चौकशी करुन कारवाई करण्याच्या मागणीचे निवेदन संघटनेचे जिल्हाध्यक्ष अरुण रोडे यांनी जिल्हाधिकारी कार्यालयात दिले आहे.

पारनेर तालुक्यात अवैध वाळू व्यवसाय करणारे शंभर पेक्षाही जास्त वाहतूक करणारे वाहनांचे सीसीटीवी फुटेज उपलब्ध आहे. मात्र उपप्रादेशिक परिवहन कार्यालयाचे मोटर वाहन निरीक्षक यांनी अवैध वाळू व्यवसायिकांशी अर्थपूर्ण संबंध ठेवून जाणीवपूर्वक फक्त पाच वाहनांवर कारवाई दाखवली आहे. ही कारवाई देखील माहिती अधिकारातून उघड झाली आहे. अशा अधिकार्‍यांच्या बेजबाबदारपणामुळे अवैध धंद्यांना पाठबळ मिळत असून, सदरच्या परिसरात वाळू तस्करांची दहशत निर्माण झाली असल्याचा आरोप अन्याय निवारण निर्मूलन सेवा समितीच्या वतीने करण्यात आला आहे.

पारनेर तालुक्यात दिवस, रात्र वाळू वाहतूक सर्रास सुरु आहे. अर्थपूर्ण संबंध ठेवून फक्त पाच वाहनांवर कारवाई करुन इतर वाहनांना सुट देण्यात आली आहे. दिशाभूल करणारा अहवाल दाखवून शासनाची फसवणूक केली जात आहे. यामुळे सरकारचा मोठा महसुल बुडत आहे. शंभरपेक्षा जास्त वाहनांची सुरु असलेल्या वाहतुकीचे चित्रीकरण सीसीटिव्ही फुटेजमध्ये कैद झाले आहे. हा पुरावा म्हणून सीसीटिव्ही फुटेज तपासूण संबंधीत वाहन निरीक्षकाची चौकशी करुन कारवाई करण्याची मागणी करण्यात आली आहे.

No comments:

Post a Comment

Post Bottom Ad

Responsive Ads Here