मढी येथे नवनाथ ग्रंथ पारायण सुरू
विश्वातील कोरोना महामारी निवारणार्थ
नगरी दवंडी /प्रिंतनिधी अहमदनगर ः प.पू.कानिफनाथांची संजीवन समाधी असलेल्या श्रीक्षेत्र मढी ( ता. पाथर्डी ) येथील मंदिरात विश्वातील महामारी कोरोनाच्या निवारणार्थ श्रीनवनाथ ग्रंथ पारायणाचा संकल्पपूर्वक शुभारंभ करण्यात आला. पारायणाची सांगता श्रीकानिफनाथांच्या समाधीस महाअभिषेकाने करण्यात येईल, असे श्री कान्होबा उर्फ कानिफनाथ देवस्थान ट्रस्टचे अध्यक्ष श्री.शिवशंकर राजळे, उपाध्यक्ष श्री. सुनिलराव सानप, विश्वस्त श्री. आप्पासाहेब मरकड व श्री. मिलिंद चवंडके यांनी सांगितले. ते म्हणाले, विश्वातील महामारी कोरोनाच्या संकटापासून जनतेचे संरक्षण होण्याच्या सद् भावनेने व श्रध्देने श्रीनवनाथ भक्तिसार ग्रंथाचे नऊ दिवसांचे पारायण करण्याचा निर्णय घेतला. त्याप्रमाणे मंगळवारी दि.4 ऑगस्ट 2020 ला सुमुहूर्तावर विधीवत ग्रंथ पूजा करून विश्वातील महामारी कोरोनाचे समूळ निवारण व्हावे, यासाठी नऊ दिवसांचे पारायण करत असल्याचा संकल्प करण्यात आला. महामारी कोरोनाचे विश्वामधून समूळ निवारण व्हावे, अशी प्रार्थना श्रीनवनाथांना करण्यात आली. या पारायण सोहळ्याची सांगता गोकुळाष्टमीच्या दुस-या दिवशी म्हणजेच बुधवार दि.12 ऑगस्ट 2020 ला विधीवत करण्यात येईल. याचवेळी श्रीकानिफनाथांच्या संजीवन समाधीला महाअभिषेक केला जाईल. देवस्थानमधील पुजा-यांकडून पारायण व महाअभिषेक सोहळा संपन्न होईल. दररोज चालणारे पारायण, आरती व महाअभिषेक सोहळा भाविकांना आपल्या घरी बसूनच देवस्थानच्या फेसबुकपोस्टवर लाईव्ह पहाण्यास मिळेल. नवनाथ भक्तांनी आपआपल्या घरी विश्वातील महामारी कोरोनाच्या निवारणार्थ श्रीनवनाथ भक्तिसार ग्रंथाचे पारायण संकल्पपूर्वक करावे. परंपरेप्रमाणे गावातील मंदिरांमध्ये श्रावण महिन्यानिमित्त केल्या जाणा-या श्रीनवनाथ भक्तिसार ग्रंथ पारायण सोहळ्यातही विश्वातील महामारी कोरोनाचे समूळ निवारण व्हावे, अशी विश्वकल्याणाची प्रार्थना करावी, असे आवाहन श्री कान्होबा उर्फ कानिफनाथ देवस्थान ट्रस्टच्या कार्यरत विश्वस्त मंडळाचे अध्यक्ष श्री.शिवशंकर राजळे, उपाध्यक्ष श्री. सुनिलराव सानप, विश्वस्त श्री. आप्पासाहेब मरकड आणि श्री. मिलिंद चवंडके यांनी केले आहे. |
No comments:
Post a Comment