व्हीजेएनटी प्रवर्गातील समाजघटकांच्या हक्कांसाठी काँग्रेस लढा उभारणार - मदन जाधव - Nagari Davandi : Breaking & Latest Marathi News Live, Marathi News Updates

Breaking

Post Top Ad

Responsive Ads Here

Saturday, August 7, 2021

व्हीजेएनटी प्रवर्गातील समाजघटकांच्या हक्कांसाठी काँग्रेस लढा उभारणार - मदन जाधव

 व्हीजेएनटी प्रवर्गातील समाजघटकांच्या हक्कांसाठी काँग्रेस लढा उभारणार - मदन जाधव

राज्य दौर्‍याची नगर मधून सुरुवात, काँग्रेस पदाधिकार्‍यांशी साधला संवाद


नगरी दवंडी/प्रिंतनिधी
अहमदनगर ः व्हीजेएनटी प्रवर्गात मोडणार्‍या सुमारे बावन्न समाजघटकांच्या अनेक मागण्या अनेक वर्षांपासून प्रलंबित आहेत. समाजाने संघटित होण्याची गरज आहे. विधिमंडळ पक्षनेते, महसूलमंत्री ना. बाळासाहेब थोरात, काँग्रेस प्रदेशाध्यक्ष आ.नानाभाऊ पटोले यांच्या नेतृत्वाखाली महाराष्ट्रातील व्हीजेएनटी प्रवर्गातील समाज घटकांच्या हक्कांसाठी काँग्रेस राज्यभर लढा उभारणार असल्याचे प्रतिपादन काँग्रेसच्या व्हीजेएनटी विभागाचे प्रदेशाध्यक्ष मदन जाधव यांनी केले आहे.
अहमदनगर शहर जिल्हा काँग्रेस कमिटीच्या कार्यालयात प्रमुख काँग्रेस पदाधिकार्‍यांशी जाधव यांनी संवाद साधला. त्यावेळी ते बोलत होते. यावेळी पार पडलेल्या बैठकीच्या अध्यक्षस्थानी शहर काँग्रेसचे जिल्हाध्यक्ष किरण काळे होते. मदन जाधव यांनी काँग्रेसच्या राज्य दौर्‍याची सुरुवात नगर शहरातून केली असून पहिल्या टप्प्यात ते उत्तर महाराष्ट्रातील काँग्रेस पदाधिकारी, कार्यकर्त्यांशी संवाद साधणार आहेत.
यावेळी बोलताना मदन जाधव म्हणाले की, राज्यातील बारा बलुतेदार, आलुतेदार हा सुरुवातीपासूनच काँग्रेसचा मतदार राहिलेला आहे. मात्र मध्यंतरीच्या काळात राज्यात आणि देशात सत्तांतर झाल्यानंतर या समाज घटकांना जाणीवपूर्वक तोडण्याचे काम झाले आहे. आपल्या हक्कांसाठी व्हीजेएनटी प्रवर्गातील समाज घटकांनी एकत्र येण्याची गरज आहे. या घटकांना न्याय मिळवून देण्यासाठी काँग्रेस व्हीजेएनटी विभागाच्या माध्यमातून सबंध महाराष्ट्रामध्ये संगठन मजबूत करण्याचे काम पक्षाच्यावतीने राज्यात सुरू आहे.
नगर शहर आणि जिल्हात काँग्रेस पक्षाची बांधणी सर्व समाज घटकांना बरोबर घेत महसूल मंत्री ना.बाळासाहेब थोरात यांच्या नेतृत्वाखाली जोरदार सुरू आहे. या पक्ष बांधणीच्या प्रक्रियेमध्ये व्हीजेएनटी प्रवर्गातील समाज घटकांना देखील काँग्रेस पक्ष संघटनेमध्ये सन्मानाचे स्थान दिले जाईल, असे यावेळी जाधव म्हणाले.
काँग्रेस व्हीजेएनटी विभागाची संघटनात्मक पुनर्बांधणी राज्यभर सुरू असून नगर शहर तसेच ग्रामीण जिल्हाध्यक्ष त्याच बरोबर जिल्ह्यातून प्रदेश कार्यकारीसाठी प्रदेश पदाधिकार्‍यांची निवड केली जाणार आहे. ना. बाळासाहेब थोरात, युवक प्रदेशाध्यक्ष सत्यजितदादा तांबे, आ.डॉ.सुधीर तांबे, शहर जिल्हाध्यक्ष किरण काळे यांच्या नेतृत्वाखाली नगरमधील व्हीजेएनटी समाजाला एकत्रित करण्याची क्षमता असणार्‍या नव्या नेतृत्वाला जिल्हाध्यक्षपदासाठी काम करण्याची संधी दिली जाईल. यासाठी इच्छुकांची चाचपणी केली जात असल्याचे मदन जाधव यावेळी बैठकीत बोलताना म्हणाले.
शहर काँग्रेसचे जिल्हाध्यक्ष किरण काळे म्हणाले की, काँग्रेस हा धर्मनिरपेक्षता या संविधानाच्या तत्वावर चालणारा पक्ष आहे. समाजातील सर्व धर्मीय, जातीय घटक यांच्यामध्ये सलोखा ठेवून सर्वांना न्याय देण्याची भूमिका काँग्रेसने सातत्याने घेतलेली आहे. मनुवादी भाजप सरकारने मात्र धर्माधर्मात, जाती-जातीत द्वेष निर्माण करण्याचे काम सुरु केले असून यामुळे देशाच्या अखंडतेवर गदा येत आहे. वाढलेली महागाई, डिझेल, पेट्रोल, गॅसचे वाढलेले दर यामुळे सामान्य देशवासीयांचे कंबरडे मोडले असून येणार्‍या काळात मोदी सरकारला सत्तेतून पायउतार करण्यास या देशातील जनताच भाग पडेल. या लढाईमध्ये काँग्रेस व्हीजेएनटी विभागाच्या कार्यकर्त्यांनी काँग्रेस पक्षाच्या माध्यमातून मजबूत संघटन उभे करून रस्त्यावर उतरत जुलुमी मोदी सरकारला जाब विचारावा, असे आवाहन यावेळी काळे यांनी केले.
यावेळी व्हीजेएनटी काँग्रेसचे प्रदेश पदाधिकारी लक्ष्मणराव भोसले, जिल्हा समन्वयक ज्ञानदेव वाफारे, शहर काँग्रेस जिल्हा उपाध्यक्ष खलील सय्यद, युवक काँग्रेस जिल्हाध्यक्ष स्मितल वाबळे आदींची भाषणे झाली.  यावेळी व्हीजेएनटी प्रदेश काँग्रेसचे भीमराव बंडगर, रवींद्र तंवर, दत्ता गाडे, दादा चौधरी, शहर काँग्रेसचे जिल्हा उपाध्यक्ष अनंतराव गारदे, शहर जिल्हा उपाध्यक्ष निजाम जहागीरदार, विद्यार्थी काँग्रेसचे प्रभारी अनिस चुडीवाला, युवक काँग्रेस अध्यक्ष ड. अक्षय कुलट, क्रीडा काँग्रेस जिल्हाध्यक्ष प्रवीणभैय्या गीते पाटील, विद्यार्थी काँग्रेस अध्यक्ष सुजित जगताप, शहर जिल्हा खजिनदार मोहनराव वाखुरे, शहर जिल्हा सचिव गणेश आपरे, राहुल गांधी विचार मंचाचे शहर अध्यक्ष सागर इरमल, अजय मिसाळ, युवक काँग्रेस उपाध्यक्ष विशाल घोलप, सुरजभाऊ साठे, विद्यार्थी उपाध्यक्ष सोमनाथ गुलदगड आदी उपस्थित होते.

No comments:

Post a Comment

Post Bottom Ad

Responsive Ads Here