पत्रकाराचे अपहरण करून हत्या केल्याप्रकरणी एकजण अटकेत

पत्रकाराचे अपहरण करून हत्या केल्याप्रकरणी एकजण अटकेत 

नगरी दवंडी/प्रतिनिधी
राहुरी ः राहुरी शहरात पत्रकाराचे अपहरण करून हत्या केल्याच्या गुन्ह्यात चौघांचा सहभाग असल्याचे तपासात पुढे आले . त्यातील एकाला पोलिसांनी ताब्यात घेतले असून , गुन्ह्यातील वाहन ताब्यात असल्याची माहिती पोलिस उपअधीक्षक राहुल मदने यांनी दिली.
लाल्या ऊर्फ अर्जुन विक्रम माळी ( रा . राहुरी ) , असे ताब्यात घेतलेल्याचे नाव असून , कान्हू गंगाराम मोरे ( रा . वांबोरी ) , अक्षय कुलथे , तौफिक शेख अशी पसार झालेल्यांची नावे असल्याचे उपअधीक्षक मदने यांनी सांगितले . मंगळवारी ( दि. 6 ) दुपारी राहुरीतील मल्हारवाडी रस्त्यावर पत्रकार रोहिदास राधूजी दातीर ( वय 48 , रा . उंडे वस्ती , राहुरी ) यांचे
अपहरण करून त्यांची हत्या झाली . मृतदेह राहुरी महाविद्यालय रस्त्यावर एका मोकळ्या प्लॉटमध्ये टाकण्यात आला . याप्रकरणी बुधवारी रात्री म्हैसगाव परिसरातील जंगलात पाठलाग करून अर्जुन माळीला पोलिसांनी ताब्यात घेतले . त्याचा साथीदार अक्षय कुलथे अंधाराचा फायदा घेऊन पसार झाला . गुरुवारी गुन्ह्यातील जीप ( एमएच 17 एझेड 5995 ) तेलकुडगाव ( ता . नेवासे ) येथून पोलिसांनी ताब्यात घेतली .
उपअधीक्षक मदने यांनी सांगितले की , अर्जुन माळी याने प्राथमिक चौकशीत अन्य साथीदारांची नावेही सांगितली . स्थानिक गुन्हे शाखेची तीन , राहुरी पोलिस ठाण्याची दोन , श्रीरामपूर उपविभागीय पोलिस कार्यालयाचे एक , अशी एकूण सहा पोलिस पथके पसार आरोपींचा शोध घेत आहेत .